政壇：張建宗贏長者歡心

立法會財委會日前再度審議長者生活津貼撥款，又一次因為長毛打拉布戰食白果收場，呢場戰事已經搞到民間嘅耐性愈來愈少，而月來忙於游說同舌戰議員嘅勞工及福利局局長張建宗（小肥張）雖然喺立會飽嘗苦楚，但去到長者群中卻變成財神，一係受到英雄式歡迎，一係就被大批忠實擁躉包圍，尋日佢出席一個活動時，更有大批長者粉絲由頭跟到尾，真係乜嘢心傷都醫好囉！

拍手支持交足戲

小肥張前日開財委會開到夜晚十點幾鐘，今朝又去社聯舉辦嘅長者日活動，咁頻撲之唔係要冧班長者囉。據講喺活動上，小肥張去到邊都有人爭住同佢影相，講咩都有長者拍手支持，當佢喺台上宣布長者明年三月有望可以兩元搭小輪去愉景灣嘅時候，仲有長者交足戲、好驚奇回應話：「真係o架？」

班長者咁識做，月來深受拉布困擾嘅小肥張真係好窩心。不過長者嘅溫情點止咁小兒科？尋日活動完結後，當小肥張同在場傳媒講緊長津撥款安排時，一班忠實嘅長者粉絲繼續留守，聽足整場對答，人人都聽得好投入，不時點頭和議，又拍手支持，連扑咪都有粉絲撐場，真可謂無憾兼不枉此生喇！

所以話呢，做官嘅真係要出席吓呢啲活動，起碼到星期五財委會新一個會議前，小肥張都可以袋住長者嘅慰藉、繼續剪布呀！