政壇：搞搞政：票都投錯黃碧雲又出醜

上任一月之後，立法會新丁表現各有評說，白鴿黨黃碧雲尋日又鬧出投錯票事件，累到公文袋梁家傑喺立法會內務委員會動議，即要求喺大會就行政會議成員林奮強休假安排進行休會辯論被否決。事後黃碧雲發現出錯要求改正，內會主席梗係唔批喇，仲話佢有三次機會都冇核實清楚，鬼叫黃碧雲投票時一舊雲咩，今次衰咗真係唔賴得人！

黃碧雲之前喺社交網站話，喺區議會沙田鞍泰區補選同佢哋爭地盤嘅新民主同盟係民建聯B隊，結果被網民群起攻之，搞到要急急道歉，已經遭人非議。尋日內會就袋巾傑嘅動議投票，結果係二十九票贊成、二十九票反對、一票棄權，內會主席梁君彥按慣例投反對票下，袋巾傑嘅動議當堂被否決。

黃事後話佢明明係投贊成票，結果變成棄權，主席就反駁話，投票時同投票後，佢已經叫議員核對結果，其後顯示屏亦顯示過結果，黃碧雲喺三個步驟都冇提出，佢係唔會再改投票結果。呢個故事對新丁議員真係一個教訓，賭枱都買定離手喇，立法會投票點可以咁輕率呢？