SUN奇古怪：Sun潮語：【包膠】

記得月前十號風球，搞到一海都係膠？當時全港市民萬眾一心一齊搶灘執膠，場面浩大，仲成為國際新聞。到底啲膠依家去咗邊？邊個要對事件負責？睇怕都係不了了之，博你唔記得就算。

風流總被雨打風吹去，讓一切隨風，想要「包膠」？喺呢個咁膠嘅時代，所有「包膠」都只不過係膠戲一場。

潮語「包膠」即係報告，英文Report，「包膠」其實就係報告嘅普通話發音。「Bao Gao」用廣東話寫出嚟就變成「包膠」。好人好姐好地地報告又點會變咗「包膠」咁膠嘅呢？整古做怪就梗係有啲古怪啦！

「包膠」其實最先喺啲網上夜遊討論區度出現，當啲男人去完某啲娛樂場所夜遊，總會喺啲討論區度做個賽後「包膠」。「包膠」一下那些地方嘅質素同服務，又或者「包膠」一下邊間係黑店，有入無出，提醒各路夜遊同路人要小心提防。

一份好嘅「包膠」唔止繪影繪聲，仲會令看的人恍似身歷其境，同寫「包膠」嘅人同喜同悲。

係o架，有時真係好悲o架！大家諗吓，本來諗住去尋開心，點知上咗賊船，畀人劏到一頸血，睇到呢啲「包膠」真係聞者心酸……

時至今日，「包膠」唔止喺網上分享。平時口語都會用到「包膠」呢個字。好多三五成群無個好人嘅北上尋歡團，好多時一夜風流之後第二朝都會飲早茶，互相「包膠」吹噓一番，做個賽後檢討，有啲眉飛色舞，有啲氣息全無，其實淨係睇樣，唔使開口都知個「包膠」係點啦！