政壇：胡炎松自爆初戀訂終生
潮州商會青委副主任Anven胡炎松出席公開活動好多時都係一支公，老婆收得好密實，佢話太太性格比較靜，好少應酬，所以身邊好多老友都未見過佢太太嘅真面目。不過佢日前就傳咗兩張同太太嘅合照畀記者，仲自爆同太太係書友，而且大家都係初戀，點知一拍即合。話說Anven當年讀緊中五，認識咗當時係同學嘅太太，但嗰個年代嘅年輕人純過蒸餾水，又點敢開口追女仔吖！但眼見就快畢業，佢怕再冇機會向對方示愛，於是鼓起勇氣拖對方隻手，結果成功贏得美人歸。佢對愛妻讚不絕口，結婚二十幾年來都好信任佢，有時佢要往返內地公幹，太太從來都唔過問，亦從未出現「奪命追魂call」，令佢可以專注工作，所以話成功男士背後總會有個女人支持係冇錯嘅。
胡炎松同太太結婚多年恩愛依然。（受訪者提供）