物價舖租樣樣漲 最低工資得個樣

打工仔有咩望？梗係望加人工啦。嗱，最低工資委員會尋日完成檢討，建議將最低時薪由二十八蚊增至三十蚊。不過耐人尋味嘅係，唔單止老闆對今次加人工叫苦連天，打工仔亦係擳都唔笑，究竟點解呢？

唔經唔覺，最低工資實施超過一年，近月檢討期間勞資雙方出現極大分歧。勞方認為最低工資最少要加至三十三蚊，資方則企硬，話頂多接受二十九個半喎。雙方態度強硬，一度令尋日嘅會議陷入僵局，最終要由委員會主席出手，提出三十蚊嘅建議，雙方先肯讓步咋。最低工資報告將於下月底前提交特首及行政會議審批，最快明年五月生效。

統計處數字顯示，目前有三十三萬名勞工攞緊最低工資，照道理講，有得加人工，打工仔應該開心至啱，但實情恰恰相反。有上咗年紀嘅保安員坦言唔加好過加，擔心僱主支出大咗，寧願請後生仔，自己遲早失業喎。又有髮型屋學徒慨嘆，未有最低工資之前，佢哋嘅薪金係計佣嘅，多勞多得，但自從實施最低工資後，做又三十六，唔做又三十六，好唔公平咁話。

其實，打工仔笑唔出仲有一個更大原因，咪就係通脹呢隻猛虎囉。由去年至今，通脹率已經累升百分之五點四，百物騰貴之下，人工早就跑輸大市，加咗等如冇加。最近有快餐店推出限量四蚊飯，大批市民天未光就去排隊，就知道搵食幾咁艱難啦。仲有呀，新嘅最低工資明年先至實施，到時係乜嘢環境根本冇人知，所以話呢，有得加人工只算係好過冇。

講句公道話，資方亦有佢哋嘅難處。眾所周知，香港租金貴到離晒譜，好似旺角奶路臣街一個地舖，最近竟然以一億元「癲價」成交，呎價超過四十六萬元，係咪嚇鬼死吖？咁嘅營商環境，你話資方有乜辦法唔叫苦連天呢？有東主計過條數，話最低工資加到三十蚊後，人工支出足足佔盈利嘅一半，租金又不斷飆升，冇辦法唔將成本轉嫁消費者。羊毛出在羊身上，最低工資衍生連鎖反應，推高通脹，最後受苦嘅，咪又係基層市民。

講到尾，問題都係出自高地價呢個「死症」身上，惟有增加土地供應，減輕租金負擔，勞資雙方先有好日子過。可惜吖，梁振英政府提出新界東北發展大計，竟然被政客扣上「割地賣港」帽子，增加土地供應阻力重重。咁搞法，老闆同打工仔想有啖安樂茶飯食下，難咯！叮！