SUN微博：打橫嚟講：亞洲先生香港良心
感動呀！真摯呀！
唔好以為我睇咗咩泡菜片，我係為亞洲先生呢項盛事而感動！一班年屆中年的漢子，依然有心有力，使出十八般絕技，又出蕉又晒肚，為博諸君一粲，亦不乏保養得宜、有真材實料者，能不感動嗎？特別係，佢哋成功將焦點由班大隻佬轉移落佢哋嘅內涵上，扭轉只重外表嘅邪風。
例如報稱鞋類工程師嘅鄧簡文，雖然又真係唔知有幾大工程，但係佢為參選而表現出嘅心機，又真係幾大。你睇佢，喺乳頭對上位置，貼上兩梳後現代得嚟又不失幽默嘅蕉之餘，仲使出雙蕉棍，誓要揈出主流價值不能容納嘅笑點，一於做騎呢界嘅李小龍。
而另一位參賽者吳華星，就有網民將之與教育局局長吳克儉、警務處處長曾偉雄相提並論，實在其心可誅！外表無得比唔在講，星爺佢一副武學宗師模樣，六件腹肌已收唔住其丹田氣海，渾然成一，其餘兩位，真係得罪講句，拍翼都追唔上呀！勸兩位一句，以武止戈，千祈唔好濫用自己手上嘅權力或者武力呀，咁先可以食得到大師嘅塵。
樹大有枯枝，當然唔會人人都係極品，好似有位參賽者嫌自己肌肉無線條，偷偷上粉底，無料扮四條，畀人揭穿仲要揼地，一副無品嘅粉樣。我勸正義嘅亞視，要及早將啲無人睇嘅嘢及早摺埋、收埋、清走埋！學「主要投資者」王征話齋：亞視，係得嘅！
次文化考古學家，對城中潮語有深入研究，博徵博引，廢官廢人行埋一邊。
就係敢爆：光復上水
讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！
email：sunweibo@opg.com.hk
