政壇：林健鋒爛Gag避談入行會
中華總商會尋日舉行酒會，特首梁振英率領多名問責官員出席，好多政商界人士都有嚟，仲見到已退休嘅前高等法院上訴法庭副庭長胡國興，原來胡官最近忙緊搬屋。佢話自己搬出後打算租樓住，因為美國QE3（第三次量化寬鬆計劃）會推高樓價，莫非佢暗示自己買唔起樓？當問及日後冇得住山頂慣唔慣，佢答話唔會，最緊要有地方住喎！
在場仲有盛傳就快加入行政會議嘅立法會總商會代表林健鋒，當佢聽到有人提早叫佢做「雙料議員」，佢發揮「搞爛gag」嘅急才，話「雙料」咪即係「放料同收料」囉，但喺佢身邊嘅港區全國人大代表王敏剛唔放過佢，即時叫佢做「紅人」。
另外，本身係全國政協常委嘅友好協進會會長陳永棋自爆，明年三月換屆時唔會再做會長，唔知邊個會做接班人呢？佢嘅貼士係舊嘅政協常委喎！大家不妨又估吓吖。
