SUN熱辣：傳播日本腦炎瘧疾可致命

全港多區蚊患嚴重，蚊蠓「梗有一隻係左近」。醫生警告，蚊可傳播日本腦炎、瘧疾等致命傳染病，呼籲市民必須做好防蚊措施，以免中招。

醫學會前會長蔡堅稱，夏天為蚊患高峰期，被蚊蠓叮咬求診個案亦會較多，「好嚴重嘅傳染病，例如登革熱、日本腦炎同瘧疾，都會經蚊隻傳播。大部分個案中，被蚊咬嘅人都只會出現發炎或者腫痛。」他指出，各種傳染病中，又以瘧疾最危險，可引致腎衰竭等嚴重併發症，「最嚴重係上腦，分分鐘死人。」

香港蟲害控制從業員協會會長梁廣源補充，蠓不會傳播病毒及細菌，但被蠓叮後，傷口會極度痕癢及刺痛，用手抓破，會感染細菌，令傷口持續發炎。

「要預防畀蚊咬，市民去郊區時，應該着淺色嘅長袖衫褲，同埋喺身體外露嘅部位噴蚊怕水。」除外出時做足防蚊措施外，蔡堅提醒市民，家居亦應做好防蚊工作，如定期清理積水等。