政壇：搞搞政：學民思潮拒辯論 劉夢熊斥「一言堂」

國民教育推行與否爭議多多，好多人都話近排嘅社會氣氛令人窒息，缺少理性嘅空間。全國政協委員劉夢熊日前就睇唔過眼，邀請有份發動今次反國教活動嘅學民思潮成員，就國民教育嘅問題展開辯論，準備同佢哋喺講台上見，點知畀人請食大檸檬。劉夢熊尋日講開呢件事時就好勞氣，批評學民思潮班人係「一言堂」。

學民思潮拒絕辯論嘅理由係時間倉促，但劉夢熊話自己早於二十四小時前邀請對方辯論，時間一啲都唔倉促。又係嘅，學民思潮發起嘅活動早在暑假前已開始，劉夢熊認為既然大家就呢個議題談論咗咁耐，相關論據應該早已經入晒腦至係，就算要即興辯論都冇問題啦，何來時間倉促呢？

弊在呢場辯論最終都變成一方唱獨腳戲，而隨時準備上場嘅劉夢熊亦好失望，回應話反對洗腦教育嘅人其實都係一言堂，經唔起辯論，唔敢正面交鋒至真！