政壇：政壇元老分身助陣

立法會選舉今日投票，候選人同各陣營尋日都把握機會衝刺、告急，更搵政壇元老支持，鄉議局主席劉皇發就好唔得閒，無論鄉事派或民建聯搵佢，佢都全部書面簽晒名表示支持，投票前一刻，鄉事派新界東候選人又搵佢幫手，結果發叔又幫佢錄製一段拉票聲帶，據講仲係喺酒店廁所裏面錄音嘅添。

建仔訂會議室等結果

發叔踩到盡，相比下立法會前主席范徐麗泰就舒服啲。馬季尋日開鑼，身為馬會大董嘅范太梗係現身馬場，但佢都為今日嘅投票日盡公民義務。范太話，今朝七點半就會去行使公民義務同權利喎！范太早前明刀明槍支持以前喺立法會合作開嘅舊同僚，尋日亦話會撐到底。

呢邊忙衝刺，另一邊各大政黨同候選人都要為今日嘅點票同開票作準備，今年嘅點票主場係機場亞洲博覽館（亞博館），由於路途遙遠兼通宵點票，點樣捱漫漫長夜呢？啲政黨同候選人就各出奇謀，派出最多人參選嘅民建聯喺亞博館預訂咗一個會議室等結果，有政黨則計劃租車約埋一齊出發，唔使大家為咗半夜入亞博館而頭痛。

○八年立法會選舉點票工作喺九龍灣國際展貿中心（九展）舉行，由於九展位於市區，唔少候選人同傳媒忙完日頭嘅工作後，都會返屋企小休一陣再入九展，但今年嘅點票工作就去到偏遠嘅亞博館，坊間曾傳候選人租定機場酒店房至得，最終又會點呢？

我哋問過幾個較為富貴嘅候選人，佢哋都話未必會租酒店房間休息，反而係搵啲助選團成員到點票現場「人肉」報告最新點票情況，咁啲人工豈不是貴過租酒店房？不過，據講有居於港島嘅富貴候選人早前為咗晨早喺新界東擺街站拉票，特別租咗沙田區一間酒店房過夜，為咗個議席認真落重本。