SUN微博：打橫嚟講：守留總比四圍走好！
香港特首梁振英昨日突然宣布唔去俄羅斯參加那個全球各國首領聚首一堂的亞太經合組織（APEC）會議行程，要留港處理未來幾日的公務。
這每年一度的國際大會，本只准國家元首出席，但香港小特區卻能破例，派「非國家元首級」的官員並列合照，是超級難得的出風頭機會，所以，貪威的前特首曾蔭權，就算痔瘡發也要飛去襯吓，替自家相簿「集吓郵」！
今屆，梁振英接任特首之職無耐，便有機會與全球領袖揸扒，見吓世面，在六十億電視觀眾前曝光，唔單止可以光宗耀祖，也可以順道親自跟中國領導人匯報香港事務實況，唔使畀江湖傳聞的「第二權力中心」謊報軍情，如斯咁重要嘅峰會都捨得放棄，一定有更重要嘅嘢在背後，令佢上路受阻。嗱！唔係啲二流評論估計嘅國民教育呀！而係……
尋日，梁特首撰文《上任兩個月》，廣派傳媒，自讚多個成就，例如改善小販營商環境、落實派給長者生果金、加設行人通道升降機等急市民所急的偉大壯舉；但同一日，政務司司長林鄭月娥接受電台訪問時，直指梁振英早前宣布的十項中短期房屋措施，那改建工廈變為住宅的計劃，當中原來未「掃除」城規及建築物條例的障礙，即當日，梁特首若非隨口噏，就是未準備好便撲出來派糖。林鄭咁公然拖後腿，可見政府後宮的內情多險峻，加上立法會選舉在即，若被發現大量種票或有人作奸犯科，特首行開咗，個寶座就好危危乎！都係留守鎮住安全啲！
次文化考古學家，對城中潮語有深入研究，博徵博引，廢官廢人行埋一邊。
就係咁爆：立會選舉極醜惡系列
讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！
email：sunweibo@opg.com.hk
