政壇：政商定格：李錦記迷你憲法防家族爭權
香港唔少企業係由家族經營開始，但去到呢個年代，又發展得咁上下，啲人又驚太家族化唔多好。香港會計師公會最新一期刊物探討過呢個問題，仲quote咗李錦記執行董事Eddy李惠民嘅管理哲學，講得相當有道理o架。
李錦記有一百二十四年歷史，Eddy係第四代管理人，佢話公司好着重公司管治，嚴禁公事同家事混為一談。大約十年前，佢哋出咗「迷你憲法」，管束家族成員對業務嘅參與度，仲限定只可有一位第四代家族成員，喺調味料同健康產品兩條生產線任管理層，避免公司有太多波士。Eddy仲話由七個家族組成嘅評議會一年開四次會，會以少數服從多數方式做決策。萬一打成平手點算？答案係：擲骰仔！
李惠民主張喺衝突出現或者家族關係同業務「有病」之前，防患於未然。（資料圖片）