政壇：搞搞政：無懼鐵頭仁打壓 三白鴿再啄公文袋

白鴿黨三名良心黨員近排公開批評公文袋，仲挺身而出向廉政公署同選舉管理委員會投訴公文袋立法會候選人虛報「教授」職銜，點知黨主席鐵頭仁竟然發公開信，同佢哋劃清界線。尋日三名黨員去信白鴿黨，再次力數公文袋嘅惡行，狠批公文袋唔做地區工作，亦唔重視市民對菲傭居港權嘅強烈情緒，淨係靠明星效應空降新界西參選，明搶白鴿黨票，打破泛民勢力平衡。

投訴知法犯法

呢三位資深白鴿黨員係陳德明、楊錚同羅國強，佢哋封信洋洋灑灑千幾字，強調投訴公文袋一直都係以個人身份進行，完全唔明點解鐵頭仁會話有機會令人誤會同白鴿黨有關，佢哋不滿公文袋班政棍聲稱維護自由、民主、人權同法治，但去到選舉就竟然學人玩知法犯法，義憤填膺下，先至會去廉署同埋選管會投訴喎。

佢哋封信嘅最後一段狠批公文袋過去嘅所作所為，其實同白鴿黨南轅北轍，好似公文袋參加五區補選，事後更打出「好在仲有公民黨」做口號，之後白鴿黨支持政改方案，公文袋又打對台重申「寧願原地踏步」，擺明有心搞白鴿黨。佢哋之前嘅意見遭鐵頭仁打壓，白鴿大佬會唔會繼續一言堂呢？因住選民懲罰呀！