政壇：授勳評審委員會大換血
貪曾在任時，七一授勳變咗佢嘅政治酬庸派對，「曾朋友」相繼獲頒勳章，隨住「曾落梁上」，呢種低劣嘅酬庸文化亦有望改變。政府尋日公布最新嘅授勳評審委員會名單，換咗好多新血，雖然同行會執位有關，但獲得留任嘅舊成員中，冇做過高官嘅只有前立法會議員劉千石。
政府規定，授勳評審委員會由政務司司長任主席，政府同時規定委員會入面要有行政會議成員，所以行政會議召集人林煥光、成員羅范椒芬、張震遠同李國章都加入咗委員會。舊人方面，基本法委員會副主任梁愛詩、前金管局總裁任志剛都有留任。新成員就有盛傳會出任中央政策組全職顧問嘅嶺南大學校董會副主席高靜芝。
另外，政府亦宣布委任前立法會議員李家祥接替已出任發展局局長嘅陳茂波，出任法律援助服務局主席。
