政壇：周一鑊驚獲名譽院士銜

香港大學尋日公布頒授名譽大學院士銜畀九位人士，但最驚嚇係食物及衞生局前局長周一鑊榜上有名，莫非港大頒錯銜？點解咁講？周一鑊在任局長時，醫療事故鑊鑊新鮮鑊鑊甘，幾乎「每日一鑊」，因而被封周一鑊呢個外號。食物及衞生局喺周一鑊領導下，前線醫護人員過住非人生活，最終團結抗爭，掀起一場「嬲爆」運動，人人高喊叫佢下台，試問佢仲有乜顏面接受呢個名譽院士銜呢？

港大喺新聞稿話名譽院士銜係頒畀傑出人士，可惜周一鑊係「杰撻撻」個「杰」，在任局長期間發生嘅醫療事故單單都杰撻撻。而喺佢嘅名譽院士簡介，亦只係介紹佢過去做過乜嘢公職，最多只係話佢參與過社會工作同推動殘疾人士體育運動發展，好難說服公眾佢有任何貢獻，加上早前其寓所露台被揭發圍封僭建醜聞，真係唔知點解可以頒個名譽院士銜畀佢。

今年名譽大學院士頒授典禮將喺十月四號舉行，最特別嘅係，會由被喻為立法會「大懶蟲」之一嘅李國寶以港大副校監身份頒發，「大懶蟲」頒畀「杰出人士」，真係物以類聚。