政壇：政商定格：朱仲賢澳洲夜訪貓頭鷹
專幫城中明星名媛執靚樣嘅星級形象指導Ricky郭慶彬喺銅鑼灣有間時裝店，日前見到知名節目製作公司大舞臺嘅創辦人Billy朱仲賢同太太Donna程瑤拍拖嚟到，Donna一入去就急不及待搵靚衫，事關佢經常幫慈善機構籌款，成日要添置新裝出席大小派對，所以特登嚟睇吓有冇驚喜。
Donna係大舞臺嘅總監，同Billy夫妻檔上陣，生意搞得有聲有色。舊年公司榮獲國際性「最佳企業節目大獎」，今年更喺跨國集團激烈競爭下，勇奪「年度最佳節目公司」銅獎，為港企爭光。Billy話啱啱同太太及兩個囝囝去完澳洲返嚟，今次旅程最特別係入住夜間動物園，喺夜晚探訪貓頭鷹等動物，玩得好盡興。
程瑤（中）同老公朱仲賢（右）都係城中潮人，同郭慶彬好啱傾。