政壇：政商定格：海外學生會籌款助仁濟
仁濟醫院同「海外學生會」合辦嘅海外學生仁濟夜慈善餐舞會日前舉行，今年適逢二十周年，賓客逼爆現場。今屆海外學生會主席Johnathan吳崇暉係仁濟總理吳國榮嘅囝囝，佢只得二十歲，但將晚宴搞得有聲有色，殊不簡單。
仍喺英國讀書嘅Johnathan話今次用咗個半月籌備，又遇上颱風多雨嘅天氣，令義賣同探訪長者活動受阻，好彩籌款成績唔錯，為「仁濟緊急援助基金」出份心力。佢話透過今次活動，體驗到玩樂唔夠做善事開心，亦開始明白點解爸爸對慈善工作樂此不疲。
場內亦見到人稱「仁濟表妹」嘅Angel賴煒琳，原來佢係總理黃美斯嘅表妹，曾以海外學生會副主席身份為仁濟籌款，佢依家係幼兒教育工作者兼作家，但依然經常抽空幫手，難怪有咁多人錫住佢。
