政壇：鐵頭仁醜態畢露

立法會新增超級區議會議席嘅選情七國咁亂，而選舉議題亦由政治事件主導，真正影響到大眾嘅經濟、民生議題都要靠邊站。正如七位候選人尋日第二度聚頭出席電台節目，都係政治議題掛帥，啄住發展局局長「波波」陳茂波前晚深夜靜靜雞發新聞稿，忽然轉口承認自己早知老婆名下單位有劏房情況啦。

插波波反被批

白鴿黨嘅「鐵頭仁」何俊仁搶先發炮批波波前言不對後語，要求波波交代清楚有關事件，該黨另一候選人涂謹申就直指波波講大話，而民協馮檢基仲連美國水門事件都拉埋出嚟講，直批波波講大話，遲早要落台。

嘩！佢哋係咁抽水，但鐵頭仁亦曾涉及懷疑僭建問題同漏報公司，而阿涂之前涉嫌用公帑供樓、馮檢基之前租用僭建招牌，事後都係輕輕帶過博大霧啫，依家郁啲就叫人下台，似乎有啲寬己嚴人喎！

做錯當然要認，建仔嘅劉江華同李慧琼就認為波波前後矛盾，不嬲敢言嘅工聯會陳婉嫻亦直斥波波「狡辯」，節目後仲意猶未盡話一切問題都係源於香港冇政黨政治，呢個問題確係值得重新思考。至於自稱為獨立泛民嘅白韻琹就話波波要盡快辭職，費事報紙要嘥時間討論喎。

正所謂「剃人頭者，人亦剃之」，咪以為走得甩。到咗各候選人喺「主場」制度嘅互相質問環節，劉江華見鐵頭仁插波波插得咁盡，忍唔住翻鐵頭仁舊帳，指鐵頭仁之前亦曾經喺立法會申報中漏報公司。

嗱！鐵頭仁被翻舊帳，正正因為佢其身不正，畀人捉到痛腳，佢係咁插波波，但唔提自己漏報嘅事，反映佢係有口話人冇口話自己囉！