政壇：甘威懶理單雞選情

泛民主派喺今屆立法會港島區直選嘅選情可以話非常嚴峻，白鴿黨以往喺港島區起碼贏一席，但今屆副主席「單雞」單仲偕重披戰衣能唔能夠食胡，真係好成疑問。同樣喺港島區嘅黨友甘乃威今屆唔選，近排亦忙到一頭煙，但原來唔係忙幫黨友助選，而係掛住自己周圍玩，睇嚟佢對單雞生死一啲都唔緊張。

王麗珠幫林智遠助選

冇做議員差唔多一個禮拜，甘威話自己冇停過，早排同老婆去咗上海玩幾日，仲發現原來上海有條街叫「民主路」，好似發現新大陸咁。

返到嚟香港後，佢都周身唔得閒，早兩日逼咗幾個鐘去書展買書，第二日又要去九龍黃金商場睇電腦同相機，可以話日日有唔同節目。但佢講咗咁耐都未講到幫手助選，估唔到甘威寧願去上海條民主路，都唔幫黨友行香港呢條民主路，足以證明選舉喺佢心目中有幾重視。

政界向來傳聞甘威同單雞不和，咁啱甘威今屆突然急流勇退，我哋直接問佢係咪同單雞不和，兩個只能活一個下被對方逼走？佢冇答任何嘢，只以點頭回覆。咁樣答法代表乜？大家心中有數啦！不過可以肯定係佢同單雞關係似乎非友好。已報名參選港島區嘅仲有葉劉淑儀、王國興、鍾樹根、陳家洛、劉健儀、劉嘉鴻、勞永樂、許青安、吳榮春同曾鈺成名單。

講開甘威，當年「怒炒女助理」風波女主角王麗珠，原來悄悄重返政圈，負責幫會計界林智遠助選立法會，聽聞好受林智遠重用。已經報名參選會計界嘅仲有梁繼昌。