政壇：劉健儀競選團違規落貨

有讀者向我哋投訴，星期日見到香港島參選人之一嘅富貴黨Miriam劉健儀競選團隊，將貨車停喺駱克道同史釗域道交界交通燈位前上落貨，涉嫌違反交通規則之餘，仲無視交通安全。

Miriam解釋話可能係工作人員趕住落貨，先一時唔記得遵守交通規則，下次會多多提點工作人員。不過，佢話呢個現象亦反映到灣仔區泊車位太少，好多貨車平時要偷雞先可以卸貨，搞到好多司機日日都驚被抄牌。佢仲食住上話，當選後會即刻改善區內交通問題喎！

佢尋日又去咗柴灣視察颱風後嘅冧樹情況，發現棵樹幾大都冇用，如果底下啲樹根唔夠多、唔夠深，只會落得「連根拔」嘅下場，希望政府全盤檢視樹木嘅生長環境。其實政黨同樹木一樣，地區工作一定要夠紮實，相信Miriam都參透到呢個道理。參選香港島嘅仲有白鴿黨單仲偕、新民黨葉劉淑儀、人民力量劉嘉鴻、建仔鍾樹根、工聯會王國興、公文袋陳家洛、獨立勞永樂、吳榮春同許清安。