政壇：AO狗仔隊監察靠五寶
政務官曾經係天之驕子，近年雖然跌咗watt，依然名氣十足。不過，近年政府屢次推出具爭議性嘅議案，立法會又經常反斗，政府不時要出動政務官（AO）「狗仔隊」箍票，官場中人大嘆，新一代「狗仔隊」愈來愈難做，因為佢哋連議員去洗手間都要跟，AO搞成咁都算喇，最弊係呢班AO升官，都驚得唔到議員信任！
堂堂AO被人叫「狗仔隊」梗係唔好聽，就連政制及內地事務局局長譚志源都唔忍心，早前幫AO狗仔隊正名為「全程監察小組」，佢哋憑藉一張圓櫈、一個快勞、一支筆及一個電話，初入行者再加埋一張集齊所有議員樣嘅貓紙，滲透喺立法會每一個角落，監察住議員嘅一舉一動。
議員同AO狗仔隊朝夕相對後，有議員見到「狗仔隊」日日坐圓櫈坐到腰都痛都唔忍心，喺行管會建議幫佢哋換番張有椅背嘅櫈。