政壇：張建宗：落區接受洗禮

特區新班子上場之後，幾乎個個周六、日都有高官落區，問責官員喺地區露面嘅機會多咗好多，同時負面新聞亦唔少，勞工及福利局局長張建宗尋日形容過去二十多天新班子嘅經歷好似：「一架飛機遇上好猛烈嘅氣流，架機有震盪」，但唔影響飛機安全同飛行，至於佢哋落區亦絕唔係做騷，而係接受炮火嘅洗禮。出動到飛機大炮嚟解畫，張建宗嘅戰鬥力同火力都好猛喎！

畀新班子些少時間

張建宗認為：「做得空中服務員就做足心理準備，有氣流係不可避免之事」，呢個時候只需要繫好安全帶，暫時唔提供服務住，到「飛穩咗再向前衝」，公眾應該畀新班子些少時間，咁樣飛機就可以繼續在高空飛行。被問到有新班子成員感嘆熱廚房真係好熱時，張建宗又有妙喻：「做得廚，就唔計較溫度。」佢仲話，廚房嘅溫度可以調校，遇有困難時應該面對、迎難而上。

喺佢口中，做高官真係挑戰多多，一陣要似廚師、一陣似空中服務員，一陣又要似戰士。果然係官場資深人士，觀察同感慨都特別多。

新班子上任之後，定期落區，有人批評高官咁樣接觸市民係「做騷」，對施政並無作用。張建宗就唔認同呢種批評，佢話，落區係一種歷練，新團隊成員接受過炮火嘅洗禮之後會不斷檢討、不斷改善，政府亦會走向一個服務型嘅政府。曾經試過靜雞雞落區家訪嘅張建宗話，佢之所以唔發通知，主要係想聽吓受訪者嘅真話，家訪時接觸到唔同背景嘅社群，對佢哋制訂政策好重要。