政壇：搞搞政：徐英偉隱形等做副局

泛民主派喺立法會打拉布戰，拖垮特首梁振英嘅政府架構重組方案，最快要年底先可以通過，搞到之前高調進行嘅副局長遴選亦被迫暫緩，名單亦未能公布。我哋收到消息，上屆民政事務局局長政治助理Caspar徐英偉，早排靜靜雞去應徵做文化局副局長。

Caspar做咗政助幾年，口碑尚算唔錯，至少肯成日蒲頭，同各級議員拉關係；自從任期屆滿後，佢嘅去向一直成謎，即使點樣旁敲側擊，佢始終唔肯透露半點風聲，加埋佢近日不時將家庭照上載社交網站，唔知仲以為佢等退休添！

有知情人士透露，Caspar早排已參加咗文化局副局長面試，據聞機會唔錯。但坊間一直要求文化局領導層應由業內人士擔任，幾可肯定做文化局局長嘅民政事務局副局長許曉暉早受批評冇文化背景，如果Caspar都入埋文化局，業界會唔會接受仲係未知之數，仲分分鐘要踎多半年先有工返。