City Parade：BB百日喇
龍年掀起生仔潮，莎莎太子女郭詩慧亦一索得男，誕下活潑龍B陳頌言。上周日，仲喺洲際酒店為龍Ｂ大搞百日宴，城中名人紛紛到賀。「莎莎ＢＢ」萬千寵愛在一身，賓客爭住抱抱，單係影相已經超晒時。炎炎夏日，想消暑，賞畫是賞心樂事。專資會理事兼藝術家楊素珊與珠寶設計師翁狄森一拍即合，早前喺半島酒店舉行畫展，宣揚環保訊息。
洲際龍B宴：輩分升呢
家姐郭詩慧（左二）與老公陳振邦（右二）喜獲麟兒頌言，身為細佬嘅Patrick（右一）輩分升呢舅父，當然要同女友Carolyn（左一）齊齊出席百日宴。
好事近
玩具公司太子爺兼菁英會委員潘偉業（左）蜜運成功，明年初便會與女友鄺晶晶（右）拉埋天窗。
志在必得
保良局副主席朱李月華月前以十多億港元取得瑞士名錶FRANCK MULLER亞洲總代理權，認真豪氣。
聚首一堂
東源大地物流公司老闆王嘉恩同太太Pauline（左、中），喺宴會上與珠寶店太子女龔嬿（右）喜相逢。
積極造人
新婚嘅菁英會主席楊華勇 （左）積極造人，菁英會前主席洪為民（右）祝佢早日做老竇。
人到禮到
四洲集團太子女戴凱欣（右）及名媛傅明憲（左）為ＢＢ送上別致賀禮。
楊素珊畫展：迎賓
專資會前會長胡曉明（中）專程賞畫，藝術家楊素珊（右）與陳竹君（左）親自招呼。
讚賞
設計大師靳埭強樂見藝壇新人輩出。