政壇：曾鈺成自認未改善立會形象

立法會主席曾鈺成尋日出席午餐會時回顧四年議會生涯，自爆任內收到十幾封官員批評議員行為不檢嘅投訴信，用「好又唔好得去邊，差亦唔差得去邊」兩句總結行政同立法關係。佢喺上任初期嗰時話，希望提升立法會喺市民心目中形象，今屆立法會仲有一個禮拜就結束，相信呢個目標都唔會達得到o架喇！

主席生涯中，相信最令佢難忘嘅一定係智鬥三位激進派議員。佢重提社民連梁國雄喺答問大會三放氣球嘅往事，話問過機電工程署咁做有冇危險，得到嘅回覆係話塑膠遇熱會溶，黐落天花板可能會火燭。

佢之後向全體議員發電郵，提醒議員唔好帶氣球入去開會。但長毛下次就攞紅白藍膠袋偷運氣球入議事廳，之後仲喺開會前將氣球放上半空。雖然佢好想趕長毛出議事廳，但由於長毛嘅行為符合議事規則，搞到佢只可以紮紮跳而冇晒佢符。

可能畀呢幾個百厭星激得多，平時一派書生咁嘅曾鈺成，扮黃毓民講嘢，竟然出奇地似，唔知佢會唔會學埋掟紙飛機同放氣球呢？