政壇：搞搞政：譚志源「雙倍負責」得把口
曾經話過會就貪曾嘥公帑豪華外訪一事「雙倍負責」嘅前特首辦主任Raymond譚志源，至今市民都睇唔到佢「負責」咗啲乜嘢，講到尾原來只係信口開河。
多名議員尋日狂插喺貪曾被揭發連串醜聞後，政府至今都未有官員下台辭職、完全漠視問責制，白鴿黨嘅劉慧卿亦寸爆Raymond，問佢之前所講嘅「雙倍負責」，係咪會將豪華外訪嘅錢雙倍捐番畀庫房或者慈善機構。點知Raymond回應所謂嘅「負責」，就係留低認錯，同埋繼續跟進事件。佢仲扮晒可憐話，其實成班特首辦團隊近期都心理受壓，不停受議員指摘，都算係問責之一喎！
聽完佢咁講，完全明白官字兩個口點解，即係任佢噏囉！原來政府內部嘅問責底線係咁低嘅，咁以前因為犯錯而辭職嘅問責官員，豈不是辭錯職？
