政壇：搞搞政：發叔回憶錄抹走林鄭？
現年七十六歲嘅新界鄉議局主席劉皇發，盛傳下屆會冧莊做立法會議員，日前佢喺大埔林村搞咗個盆菜宴，會上透露就快出版回憶錄，將佢五十幾年以來嘅從政心得記低，依家已開始聯絡代筆嘅大學教授。咦！政治人物寫回憶錄，多數係退休後先動筆，咁佢有乜隱衷呢？退定唔退呢？
咁因村屋僭建而同佢打對台嘅發展局局長林鄭月娥會唔會喺回憶錄出現？發叔斬釘截鐵咁話「我同佢冇嘢好講」，不過又話：「我睇佢惡得幾耐。」林鄭鐵腕要拆新界僭建物如果都唔落入發叔本回憶錄裏面，唔通呢件事只係佢政治生涯嘅碎料，不值一提？咁就要睇回憶錄先知有乜勁料嘞！
對於會唔會留任行會，發叔唔肯講，只係話「遲啲你哋就會知o架啦！」
