政壇：政商定格：黃家和等做龍爺瞓唔着
為咗發掘出色嘅靚奶茶同推動奶茶文化，咖啡紅茶協會快將舉辦第四屆「國際金茶王大賽」，尋日更為大賽舉行啟動禮。主席Simon黃家和笑言，諗番起前三屆比賽嘅點滴，感觸良多，興奮到瞓唔着喎，但其實佢興奮另有原因，就係佢快將榮升爺爺，新抱Iris懷小龍女七個月，真係恭喜晒！
Simon尋日請嚟前三屆「金茶王」即場炮製香滑奶茶，茶香四溢，品牌發展局主席陳淑玲、中西區區議會副主席陳學鋒、潮州商會副會長張成雄等嘉賓試飲後都齊聲大讚。Simon話今屆比賽增設廣州賽區，仲會邀請非洲、越南、印度同斯里蘭卡等業界人士來港交流沖茶文化，並將港式奶茶進一步推向世界。
黃家和（左二）聯同陳淑玲（右一）、工業貿易署助理署長蘇碧珊（左一）及貿發局助理總裁黃思慧（右二），啟動「金茶王」大賽。