政壇：政商定格：洪明基15歲食定吉野家

    • 今年都係婚嫁嘅好年，好多人大呻想搵個價錢合理少少嘅地方擺酒都好艱難，之前喺網上流傳過一張茶餐廳擺酒嘅菜單，認真誇張。之不過，聽聞原來早喺十幾年前，喺內地已經有人喺吉野家擺酒，莫非一對新人都咁鍾情牛肉飯？抑或係佢哋譜出一段牛肉飯情緣？

    早排吉野家已被注入合興，佢哋嘅新CEO洪明基話十幾年前喺北京同蒙古，已有人喺吉野家擺過酒，仲布置埋場地添，但依家梗係唔會再有啦！

    洪總十五歲時「邂逅」吉野家，當年喺美國讀書，食咗半年墨西哥卷，食到嘴都歪，有一次踩單車搵嘢食，見到個招牌印住「bowl」，即刻毫不猶豫走入去買咗三碗牛肉飯，因為實在太好味，佢即場食咗兩碗，帶咗一碗返屋企。畢業後，佢放棄咗去紐約投行嘅機會，打理家族生意，就順理成章促成呢單生意嘞。

    洪明基（右）喺九二年將吉野家引入內地東北地區。