政壇：周伯展神力一舉奪冠
眼科名醫周伯展因力挺候任特首梁振英，早前有消息話佢會加入政府，但周醫生明言唔會從政，寧願投身「救盲」工作。唔講唔知，原來周醫生仲有另一項興趣。
體重一百五十磅嘅周醫生，午餐只食兩隻香蕉，身材唔算健碩，點睇都唔似大力士，但佢月前膽粗粗上一堂舉重課後參賽，輕易奪冠。咁勁，原來多得後生時訓練有素，佢自爆當年係港大壘球隊最佳投手；執業後，每個禮拜堅持打壁球，喺多個公開賽獲獎無數，醫管局行政總裁梁栢賢都係佢波友。
但要數最大興趣，仲係培訓徒子徒孫。周醫生以「亮睛工程」副主席身份，拍住主席林順潮喺內地救盲復明多年，至今已教曉內地七十位眼科醫生做白內障手術，呢個月甘肅將有第二十三間亮睛眼科中心，佢會親自北上主持開幕，七月再同家人遊地中海充電。
