政壇：政商定格：劉永好事忙拒絕富豪玩意

相信大家都見識過內地「先富起來」嗰班同胞嘅購買力有幾驚人，但有啲富豪發咗達一樣咁慳儉，仲係遵循自己嘅消費哲學，好似新希望集團董事長劉永好就自爆鍾意簡樸生活，唔打高爾夫、唔識買豪華遊艇，最大嘅消遣係睇書、運動同影相；食飯嗌餸都係地道川菜，如麻婆豆腐、回鍋肉同螞蟻上樹。不過佢話唔係專登慳家，只係工作太忙冇時間消費啫！

內地「光伏大佬」英利新能源總裁苗連生，個人財富超過一百四十億人仔，一樣唔鍾意喺自己身上使錢。呢位河北首富嘅消費習慣好簡單，只要唔使為食飯埋單發愁、着衫乾淨得體、住嘅寬敞舒適就得，「做乜一定要名牌啫？」

仲有內地人工最高嘅女性經理—格力電器總裁董明珠，佢唔鍾意消費者買公司產品嗰陣討價還價，但就專吼減價戰至去買衫，策略係「冬天買夏天衫，夏天買冬天衫」。嘩！數口真係精噃！