政壇：政商定格：魔童知天命為創意搞電視
「電訊魔童」王維基放棄電訊業務專心做電視大亨，早前佢話呢個決定係受哈佛大學哲學教授Michael Sandel寫嘅《正義──一場思辨之旅》嘅啟發。尋日佢再話亦都受著名外國電影人Scott Neeson影響，佢某次放假去柬埔寨，臨上機前遇上拾荒兒童，呢次經歷唔單止令佢辭咗份工，仲賣晒物業去柬埔寨開設孤兒院。
魔童話今年五十歲，所謂「五十而知天命」，加上舊年底率領公司員工接受柬埔寨嘅「洗禮」，就有所感知要賣咗電訊業務，而家陣創業只希望為本港創意出力，而香港電視係創意行業好重要嘅基石。
魔童尋日出席咗安永嘅「企業家成功之道」論壇，同場仲有同佢「交情匪淺」嘅香港總商會總裁袁莎妮，雖然佢哋同枱食飯，兼且同台影大合照，但就冇乜交流喎！
王維基（左三）同袁莎妮（右二）罕有同場出現。