政壇：食力簡入上水「摷」侯志強

現任上水鄉事務委員會主席侯志強，早前喺法庭頂證前主席簡炳墀（食力簡）賄選，食力簡最後被判罪成，現正保釋等候上訴。尋日下晝，上水坑頭村一名非原居民喺村內舉行就職典禮，食力簡、多名建仔要員等都有派代表出席，現場兩班人馬卻一度對峙，侯、簡兩人雖然緣慳一面，但地區風雲卻似停不了。

典禮開始前，有架車泊咗喺進出會場必經嘅通道中間，令現場大排長龍，大批嘉賓被迫落車步行入村。期間有人爬上典禮嘅巨型花牌，將出席嘉賓嘅名牌成個拆咗落地。其後食力簡喺多名黑超漢保護下，一邊爆粗，一邊衝咗去村公所門口大叫「侯志強出嚟」，但叫極都冇人回應。

大半個鐘後，侯志強施施然現身，仲陪同阻塞通道嘅車輛車主與在場警員調停事件。侯解釋，尋日同一時間「咁啱」有人喺附近舉辦活動，慶祝上禮拜嘅母親節，雙方嘉賓都要用呢條路喎。佢又不點名批評有人搞分化：「非原居民村長就職，冇理由唔請原居民村長」、「有人輸咗咪算囉，最多下次選過，唔使搞埋啲咁嘅小動作」。呢個時候，食力簡已經走咗。