SUN微博：Sun畸事：公公為何要讀神學？

事緣大半年前，林公公強推「立法會替補機制」惹來民意大反彈，就連兩大律師公會都睇唔過眼，林公公見勢色唔對，於是搵煲呔密斟。

煲呔曾：你做咁多壞事，遲早落地獄。

林公公：我夠想做好人咯，我都想上天堂o架！

煲呔曾：你有冇學我個個星期都去天主堂禮拜呀？

林公公：冇喎，我啲時間要嚟背《基本法》吖嘛。

煲呔曾：你冇去過禮拜，今次要一鋪過清晒條數。

林公公：可以咁o架咩？根據《基本法》……

煲呔曾：STOP！你做咗十年高官，計落應該要去番520次禮拜，條數先夠冚。想一次過搞掂，就去讀番個神學學位啦。

林公公：黐線！我日日畀人鬧都唔離開政府，就係因為我最憎讀書！你家吓叫我去讀書，即係叫我去死啦！

煲呔曾：咁讀吓短course囉。你做慣錄音機，背嘢咁叻，一年實搞掂啦！肯定唔使冧班！

林公公：你真係蝦我淨係識背嘢呀？讀一年，兩個學期加埋得嗰250日，仲有270日點算先？

煲呔曾：「嫁雞隨雞」！你係男人就講掂你老婆，同你情侶檔孖住齊齊讀書，平時稍為祈吓禱咁，拉上補下，咁得未？

林公公：我……我仲係男人呀呵？

煲呔曾：挑！你讀完記得學葉劉，出選立法會，仲要做埋個主席，勢行趕走隻癲狗！你話好冇？

林公公：正喎！我晨早就想趕狗……趕佢走好o架嘞！咦？平時見你轉數好似冇咁快o架，醒咗咁多嘅？

煲呔曾：嘻嘻……係人都知我度縮數好叻o架啦。你快啲搵資料啦，過咗deadline，就算做人知進退都冇得你退呀！