政壇：政商定格：李妮大露背艷壓博愛
喺日前舉行嘅博愛醫院董事局就職禮上，新主席潘德明一呼百應，眾老友齊齊入局拍住做善事，令到今屆董事局成員達到四十人嘅爆燈上限，人數係各大慈善團體之冠。晚宴上，副主席Lily陳李妮出動秘密武器，着上親自設計嘅性感露背綠色絲質晚裝，艷壓全場。
原來Lily件性感禮服已有十年歷史，佢年年着一次，一來提醒自己身形唔好走樣，二來支持環保。佢笑稱，件禮服係佢尺度最開放嘅衫，但好彩老公冇詐型喎！
前總理趙瑤嘅老公Sam林辰峰都係新總理，原來趙瑤已有喜兩個幾月，年底將會添多名龍B，難怪阿Sam代妻出征，真係恭喜晒！
