政壇：搞搞政：阿Paul拒入黨請葉劉食檸檬

今屆立法會九龍東由四席增至五席，形象相對獨立嘅旅遊界議員Paul謝偉俊成為西環嘅力捧對象，望佢由功能界別轉戰九東，預料好大機會以最後一席入立會。據聞新民黨主席葉劉淑儀對阿Paul政治能量突然大增刮目相看，早前就搵埋佢食飯「摸底」，事後雙方嘅良性互動消失得無影無蹤，明眼人一睇就知阿Paul請葉劉食檸檬。

阿Paul事後話已經有另一半「白姐姐」白韻琹喺屋企「指指點點」，暗示自己係怕女人所以入黨免問。葉劉接受查詢時冇否認曾搵過阿Paul入黨，又話查實佢只係同阿Paul食過一餐飯，事後都冇跟進，依家已對阿Paul失去興趣。葉劉嘅態度突然大轉變認真耐人尋味，究竟佢哋之間發生咗乜嘢事呢？

都唔難理解嘅，事關阿Paul話明參選係主打獨立同專業人士，自然唔想有政黨綁身。其實佢嘅政治野心都好大，除自己落場直選外，疑似為白姐姐參選超級區議會「試水溫」。佢話白姐姐有知名度，即使要攞參選提名亦唔會太難，如果成事，佢哋將會係夫婦檔參選立會。