政壇：大口湯撐惡法被孤立

立法會喺下月中恢復二讀《二○一一年版權（修訂）條例草案》，大批網民為咗扑低呢條所謂嘅「網絡廿三條」，最近喺網上鬧爆傾向支持草案嘅立會議員湯家驊（大口湯）。最搞笑嘅係大口湯所屬嘅公文袋，竟喺最後一刻離棄佢，大口湯尋日大呻公文袋無義氣，仲第N次聲言退黨。

近年網民興起透過改圖、改歌同改影片，「惡搞」煲呔曾政府同其他政客，有網民擔心有關草案通過後，令佢哋稱為「二次創作」嘅「惡搞」行為會變成犯法，損害創作同表達自由。向來鍾意攞威嘅大口湯早前喺未經泛民主派授權下，走咗去同政府講數，最後政府同意讓步提出修訂，訂明只有嚴重損害版權持有人權益嘅「惡搞」先至算係違法。

不過，班網民要求嘅其實係全面豁免「惡搞」行為，炮轟大口湯出賣港人。公文袋為免影響立法會選情，決定離棄佢，考慮反對整條草案。其實大口湯過去多次威脅過退黨，但次次都退唔成，今次又睇吓點。