政壇：搞搞政：議員漏報利益嘥公帑遮醜

立法會議員個人利益監察委員會尋日討論，打算年花八十萬元請位專員，專門處理針對議員嘅投訴，美其名係打破議員自己人查自己人嘅老問題，但實情最終罰唔罰違規議員都唔係專員話事，加上工作量又唔係多得咁緊要，何苦嘥埋呢啲冤枉錢呢？

○九年立法會審批高鐵撥款，經濟動力議員林健鋒、專業會議「大舊石」石禮謙同工程界代表何鍾泰漏報同高鐵嘅利益，議監會查咗兩年出報告，聲言要訓誡大舊石，點知上到立法會大會，喺分組表決下逃過一劫。議監會主席梁劉柔芬同三名議員一年前又被揭漏報多項董事利益，最終求其表示關注了事。

立法會秘書處研究多年後，終於提出要搵位專員處理議員嘅投訴。專員主要處理議員個人利益、金錢利益同薪津方面嘅利益，收投訴後查唔查由佢話事，但查完罰唔罰違規議員則由議監會話事。