政壇：聞升官拆僭建林鄭封嘴

下屆政府組班成為近期政壇熱話，發展局局長林鄭月娥究竟會唔會加入新班子，現時仍未知道，但佢手上仲有一大堆難題未處理，好似新界村屋僭建咁，就係其中一個大炸彈。

二十七鄉商討反拆僭建

被喻為「好打得」嘅林鄭，原來都有嘢「唔講得」，佢尋日到電視台錄影節目，除咗同主持大談本地文化藝術發展方向等大路嘢外，主持梗係唔少得問林鄭會行人止步定係再上一層樓啦，正當大班記者好期待林鄭會漏一兩句口風之際，估唔到佢竟然斬釘截鐵咁話：「呢個問題我係咪可以揀唔答？」搞到主持冇晒癮，都唔敢再追問落去。

節目完咗之後，記者當然繼續包圍林鄭啦，雖然佢全程笑笑口，但仍然快閃走人，一條問題都冇答。睇嚟佢想保持低調，唔想再添煩添亂，尤其新界二十七鄉保家衞鄉行動組尋日下晝開會商討反拆僭建行動，召集人梁福元呢排已經好火，不斷重複話唔怕流血，都要保衞新界人嘅傳統權益，喺風頭火勢下，林鄭就更加要避吓，費事火上加油啦。　

屋宇署署長區載佳都學足上司林鄭咁快閃。話說區載佳尋日出席離島區議會會議後被記者連番追問多條問題，包括屋宇署調查「唐宮」嘅進度。會唔會請唐唐協助調查、新界僭建有幾多人登記咗，同埋北角酒店大火關唔關裝咗個特大LED螢幕事等。

點知區載佳淨係答北角酒店大火條問題，只彈咗句「LED螢幕唔屬於屋宇署管轄範圍」，就即刻搭升降機走人，睇怕都係驚講多錯多，辣慶多個火頭至唔敢出聲。