政壇：政商定格：李小鵬亮相馬場惹哄動
尋日沙田馬場好墟冚，皆因久未露面嘅前體操王子李寧同家人一齊入場捧佢匹駿駒「桂花飄香」，同行仲有已退役嘅雙槓王子、依家喺李寧旗下「非凡中國」做嘢嘅李小鵬，唔少馬迷都爭相一睹呢兩位體操界大明星嘅風采。
李寧話最近好忙，但都要抽時間陪吓家人，所以帶仔女嚟湊吓熱鬧。雖然「桂花飄香」最後只係得第三，李寧笑笑口話攞第幾冇所謂，最緊要大家開心！
今年一月榮升爸爸嘅李小鵬話啱啱喺美國返港，因為太太安琪係美籍華僑，BB女喺美國出世，太太嘅父母都係運動員，真係運動世家。佢甜絲絲咁話太太已幫囡囡改咗英文名Olivia，但就冇透露中文名。
李寧（左一）、太太（右一）同一對仔女齊入馬場撐愛駒。（潘翠華攝）
李小鵬（潘翠華攝）