政壇：搞搞政：新西爭崩頭田二少空降港島

新民黨副主席田北辰喺舊年勝出區議會議席後，一直盤算緊九月立法會喺邊度落腳，本來諗住喺新界西發展最穩陣，因為佢嘅票倉荃灣，估計最少都有萬幾票，再加埋新界西其餘幾區，要取得近三萬票，唔係冇機會。

但有建制派中人評估過，今屆新界西建制派已爭崩頭，田二少應該插針都插唔入，所以早排有建制派中人仲反建議田二少去選超級議席，跨晒五區攞票。建制派中人咁建議，全因為唔想田二少留喺新界西爭飯食，據聞連信心爆棚嘅田二少都知道建制派「陽謀」，諗過度過後覺得超級議席風險太高，所以依家仍傾向喺新界西出戰算數。

但近日又有新變數，就係黨內評估過黨主席葉劉淑儀一旦加入下屆政府，咁田二少就可能要放棄新界西轉區，空降港島。田二少就話依家未知葉劉會唔會加入政府，但如果葉劉真係入閣，個黨建議佢轉戰港島，佢都覺得有得諗，因為個黨喺港島呢個基地唔可以冇咗，點都要保住喎！