雙英就特首選舉頻頻過招，前行政會議召集人梁振英（CY）喺民調幾乎清一色領先，不過尋日輪到前政務司司長唐唐「威」番次，佢喺一項由電台舉辦嘅網上投票中當選二○一一年度風雲金句第一位，得獎金句係令佢民望大幅插水嘅「完全係垃圾」論，認真諷刺。
正所謂「一不離二」，獲選第二位嘅年度風雲金句亦同唐唐有關。唐唐早前承認有「感情缺失」，即係有婚外情，合和主席胡應湘為咗同唐唐解圍，竟然死撐話婚外情只係課外活動，意圖淡化事件，但旋即令「課外活動」一詞成為潮語，大受網民歡迎。