政壇:官場技安怕再站台出醜

一首拉咪嘅《忘不了你》,食物及衞生局局長周一鑊被網民嘲諷為官場技安,不過,一直以嚟都有好多疑似周一鑊地下粉絲,暗地裏為佢平反,話周一鑊之前出席醫學界活動嘅時候,唱得唔係咁o架,又讚周一鑊把聲夠厚,如果轉唱英文歌或者歌劇會好好多,至於上次點解會唱成咁,都只係揀錯歌啫。點知前日聖誕節西醫工會又搞周年晚會,官場技安竟然冇到。

究竟官場技安係怕再上台吖,定怕見到啲做到殘晒嘅醫生,所以前晚唔敢現身呢?聽西醫工會會長楊超發講,周一鑊以往都有嚟晚會,上年仲一共唱咗十首歌添,但周一鑊就話今年要去澳洲探親,所以唔出席嘞。既然人哋都出動到探親做理由咯,咁工會冇理由硬要人登台嘅。楊超發又講笑咁話,可能因為政府派咗六千蚊,好多人趁聖誕節去咗旅行,所以前日都去唔到晚會。

第一手消息請下載on.cc東方互動iPhone/iPad/Android Apps


「Money18免費即秒股票報價網站」現推出8升級功能,財經資訊,實時實發!