政壇：彭徐美雲義唱阿梅名曲
國際婦女會日前喺文化中心舉行粵曲慈善籌款晚會，為屬下嘅老人中心籌得逾一百三十萬元善款。粵曲之外，主席彭徐美雲當晚都落力獻唱《抱緊眼前人》、《胭脂扣》等經典時代曲，恍似「阿梅」梅艷芳上身。油尖旺民政事務專員郭黃穎琦罕有地穿上露肩長裙，客串獻唱粵曲，為晚會籌得十萬元。
彭徐美雲有老公彭曉明同囝囝彭穎生（Victor）現身支持。前消防處處長盧振雄伉儷、前入境處處長白韞六伉儷、前懲教處處長單日堅伉儷都有嚟湊熱鬧，原來白太同盧太平時都有跟婦女會去長者中心義唱粵曲。
彭徐美雲（中）獻唱，獲老公彭曉明（左）撐場。右為婦女會最年輕副主席徐守然。
白韞六（左）同太太拍拖到場，別來無恙。