政壇：翟紹唐想監警會買樓
做咗法定機構兩年嘅監警會，處理嘅投訴愈來愈多，今年審核嘅個案逼近四千大關，會方請多咗十幾個審查人員，地方自然唔夠用，監警會主席翟紹唐尋日話，依家每個月嘅租金就要成三十零萬，小數怕長計，佢哋會睇吓政府仲有邊啲地方有吉位，但又驚畀人話唔夠獨立，所以有諗過學吓平等機會委員會咁自置物業，咁樣一嚟唔使每個月咁重皮，二嚟唔使好似家吓辦事處分開樓層，成日要「遊（車立）河」。
翟主席仲話要睇埋監警會同警隊代表嘅對等問題，佢話監警會秘書長個位係D2（首長級薪級表第二級），但警隊依家嚟開會最高級嗰個係監管處處長，職級係D4（首長級薪級表第四級）。如果開會嗰陣對家職位高過自己，好難談判啫。