政壇：劉夢熊怕閒話避選區會
全國政協委員劉夢熊以敢言見稱，舊年為「結石寶寶之父」趙連海出頭而聲名大噪，當時已有人質疑佢係想爭奪明年立法會超級區議會議席，結果佢連今屆區議會選舉都無參與，令謠言不攻自破。劉夢熊尋日話，佢唔選超級區會無非係「人言可畏」。
劉夢熊除為趙連海出頭外，不時亦會幫維權人士揚聲，尋日佢接受訪問時話，暫時都無聽過話佢下屆政協無得撈。
對於係咪志在立法會，佢就話最終唔選超級區會，咪因為人言可畏、要避嫌囉！加上佢身為上市公司主席，要向股民負責。
至於功能組別，佢無興趣，咁直選又點呀？劉夢熊亦好斬釘截鐵話無意思選咯，跟住笑笑口話，如果真係選佢會去新界西，事關七三年佢着住條泳褲偷渡來港，就係喺天水圍附近嘅尖鼻咀登岸。
