政壇：搞搞政：金勞詹揪港足淪落元兇

政府話會搞好足運，但實情係點呢？港隊嘅排名跌到去全球一百六十八名，創歷史新低，七十年代做過本地班霸精工同寶路華領隊嘅立法會金融服務界議員「金勞詹」詹培忠睇唔過眼，喺立法會入咗條口頭質詢，問政府點解港隊淪落到呢個地步。

金勞詹話當年做領隊時，香港足球好威水，可以話係亞洲一哥，日本、南韓等現時嘅亞洲足球強國，當年都唔夠香港打；一九五八年亞運會，香港球員以「中華民國」名義出戰，仲贏埋冠軍。但自從佢退出球壇後，香港足運就一落千丈。佢話港足搞到排名得番一百六十八，香港足球總會同政府都要負責，冇理由佢一唔喺度，班球員就唔識踢波。咁即係話負責呢瓣嘅民政事務局局長曾德成同足總主席梁孔德都冇得甩身。

梁孔德嘅老婆係議員「蘇菲」梁劉柔芬，金勞詹今次矛頭直指足總，怕唔怕蘇菲唔高興？佢話提出呢條質詢對得住天地良心，唔想見到足總淪為「私家會所」，為咗港足前途先咁做喎！