政壇：工聯會雙將挑戰鼠王芬

工聯會喺區選獲佳績，對明年立法會選舉都雄心萬丈，我哋收到消息，工聯會已決定明年會首度派人出戰九龍西選區，最直接受影響嘅肯定係○八年選舉中僅僅夠票入立法會嘅「鼠王芬」梁美芬。

據了解，工聯會嘅布陣由超級區議會嘅「票后」陳婉嫻為軸心，帶動其餘五個地區直選參選人打仗，九龍西絕對唔可以缺席，據悉工聯會見九龍西基層眾多，今次屬意來自基層嘅代表出戰，暫時內部有兩個可能人選，分別係曾經做過勞工界立法會議員嘅工聯會副會長梁富華，以及來自建造業總工會嘅工聯會副理事長周聯僑，兩位喺勞工界都甚有名望，如果真係成事，相信有一定號召力。

九龍西選區明年議席冇增加，工聯會出人爭，○八年五位候選人中得票排最尾嘅鼠王芬就好大件事，事關佢當年得到工聯會同左派團體大力襄助拉票，最終都只得不足兩萬票，出年真係危危乎。