政壇：煲呔曾被學生清算

教院升格為大學問題困擾師生多年，政府一直採拖字訣，尋日煲呔曾去教院出席博士生畢業禮，校園廣場忽然出現一幅巨型條幅，質疑煲呔曾執包袱在即，教院升格仍遙遙無期，教院校長張炳良事後話已將學生嘅訴求轉達畀煲呔曾，不過煲呔曾喺教院逗留近兩小時，卻對學生訴求扮聾扮盲、一句回應都冇！

網民諷掌握不到社會脈搏

繼日前去中大惹嚟批評後，煲呔曾尋日又出席教院第十七屆學位頒授典禮，佢○八年出席同一活動時，曾遭學生攔路示威抗議，唔知係咪咁，典禮會場保安好森嚴，有見及此，學生就選擇遙距示威，喺教院中央廣場掛起兩幅長約二十多米、黑底白字的大型「對聯」條幅，上面寫有「特首離任指日可待、教院正名遙遙無期」。另外仲有一幅條幅掛於鐵欄上：「校長，說好的大學呢？」向張炳良施壓。

中央廣場距學位頒授典禮嘅會場有段距離，煲呔曾雖然未必望到，但條幅卻係煲呔曾要去學校前先出現，足見學生嘅戰略，可惜煲呔曾竟然扮唔知。身兼行政會議成員嘅張炳良雖然向煲呔曾講咗訴求，但佢事後都只能講：「教院已經係大學規模操作，只係欠缺正式嘅大學名稱。」跟住仲將目標轉向下屆特首人選，被問及支持邊個疑似特首候選人時，佢就話梁振英同唐英年都對教院升格大學冇表態，言下之意就係邊個支持佢哋，佢咪支持邊個囉。

煲呔曾日前出席中大新聞獎頒獎禮時，亂噏每日食早餐時都會睇六份報紙，但睇到心跳加速，之後要去教堂先可以平復心情，尋日將呢番備受批評嘅言論圖文並茂上載社交網站facebook嘅政府群組，即時畀班網民鬧爆，有網民一見煲呔曾嘅留言就批評：「一日睇六份報紙都掌握不到社會脈搏……服了！」亦有人恥笑煲呔曾：「虛偽無極限。」