政壇：象哥取消蟹宴避唐唐
建仔嘅立法會進出口界議員「象哥」黃定光，每年喺大閘蟹當造期都會同政商界老友大擦一餐，又會同傳媒一路食蟹，一路天南地北，但呢個不成文嘅慣例今年突煞停。原來象哥餐大閘蟹宴同唐唐嘅選舉工程啟動會撞埋喺聽日舉行，預期好多人會忙到甩轆，所以象哥決定取消蟹宴。
雖然象哥以撞期為由取消聚會，但亦有講法話因為佢日前現身ＣＹ梁振英嘅參選大會，搞到事後建仔鬼咁尷尬，要急忙對外澄清該黨未傾向支持邊個疑似特首候選人；加上未發生呢場風波前，象哥都冇意思要改期，但尋日就突然透過助手通知傳媒，取消原定明日舉行嘅大閘蟹宴聚會，莫非象哥想避風頭？無論如何，今年大閘蟹已接近尾聲，行家要同象哥啖蟹談心可能要等出年喇！
設計圖片及對白